“నువ్వు నా ప్రాణం.. కాదు కాదు అంతకంటే ఎక్కువే”.. అమర్ ఈ మాట చెప్పిన ప్రతిసారి ఏముందిలే అందరూ చెప్పే మాటే కదా అనుకునేదాన్ని. కానీ అమర్తో జీవితం పంచుకున్న తర్వాతే అర్థమైంది.. అది కేవలం మాట కాదు నిజంగా నిజమని. అమర్ నవ్వు చాలా స్వచ్ఛంగా ఉంటుంది.. నన్ను చూసిన ప్రతిసారి ఆ నవ్వులో “నువ్వు నా ప్రాణం.. కాదు కాదు అంతకంటే ఎక్కువే”.. అనే మాట చెప్పకుండానే చెప్పినట్లు అనిపించేది. నా కళ్లు నన్ను మోసం చేయొచ్చు మరి నువ్వు ఎలా? ఇట్లు అమర్కి ప్రేమతో(ఫోటోలు- Samayam Telugu) “ఈ క్షణం ఒకే ఒక కోరిక.. నీ స్వరం వినాలని తీయగా..” నా ప్లేలిస్ట్లో ఉన్న పాటల్లో ఎందుకో తెలీదు ఈ సాంగ్ అంటే నాకు చాలా ఇష్టం. పేరుకి విరహగీతమైనా కూడా ఆ విరహాన్ని మరిపించే ప్రేమ ఇందులో ఉంది అనిపిస్తుంది. ఏంటో అమర్ ఈరోజు త్వరగా ఆఫీసుకెళ్లిపోయాడు. ఈ ‘ప్రేమ’ చేతి కాఫీ తగిలితే కానీ బెడ్డు దిగని మనిషి.. ఏంటో ఈరోజు ఆగమేఘాల మీద లేచి రెడీ అయి ఆఫీసుకి పరిగెత్తాడు. వెళ్లే ముందు ఎప్పుడూ ఇచ్చే నా తీపి వడ్డీ (నుదుట ముద్దు) కూడా ఇవ్వలే..! అమర్.. ఏంట్రా ఈరోజు తెగ గుర్తొస్తున్నావ్.. ! కాదు కాదు మర్చిపోతే కదా అసలు గుర్తురావడానికి.. ! ఈ ‘ప్రేమ’ మెడలో మూడు ముళ్లేసి ఈరోజుకి ఏడేళ్లు అయింది మాస్టారూ.. నీకు అసలు గుర్తుందా? పెళ్లిరోజు కూడా ఆఫీసుకి వెళ్లిరావాలా.. ఏ సెలవు పెడితే నీ రెండో పెళ్లాం (జాబ్) అలుగుతుందా? సర్లే నీకెన్ని పనులున్నాయో ఏంటో? రేయ్ బుజ్జిగా.. ఆరోజు బీచ్లో నా ఒడిలో పడుకొని ఇచ్చిన మాట గుర్తుందా? అన్నీ వదిలేసి వస్తాను.. మరి ఈ ‘ప్రేమ’ని బాగా చూసుకుంటావా? అని అడిగా. ఆరోజు నువ్వు చెప్పిన మాట నీకు గుర్తుందో లేదో కానీ నాకు మాత్రం బాగా గుర్తుంది. “ఈ ‘ప్రేమ’ని కలకాలం ఇంతే ప్రేమగా చూసుకుంటా.. ఎందుకంటే నా ప్రేమ అమరం” అన్నావ్. ఆరోజు నుంచి ఈరోజు వరకూ నీతో ఉన్న ప్రతిక్షణం.. ఆ మాట నిలబెట్టుకున్నావ్.. నన్ను నీ ప్రాణంలా చూసుకున్నావ్.. కాదు కాదు అంతకంటే ఎక్కువగానే చూసుకున్నావ్. (డైరీ రాస్తుండగా మోగిన కాలింగ్ బెల్) హే.. ఏంట్రా ఈరోజు ఇంత త్వరగా వచ్చేశావ్.. ఓహో ఆఫీసుకెళ్లాక గుర్తొచ్చిందా (పెళ్లి రోజుని)?సర్లే కానీ ఇలా రా నీతో ఒక ముఖ్యమైన విషయం మాట్లాడాలి.. (బెడ్ రూమ్లోకి తీసుకెళ్లిన అమర్)ఏంట్రా టెన్షన్గా ఉన్నావ్.. ఏమైంది.. ? అంతా ఓకేనా?“ముందు ఇలా కూర్చో.. నేను చెప్పేది జాగ్రత్తగా విను.. నా సేవింగ్స్ అకౌంట్లో 25 లక్షలున్నాయ్.. అలానే 50 లక్షల టర్మ్ ఇన్సూరెన్స్ కూడా ఉంది. నువ్వు చాలా స్ట్రాంగ్ లేడీ.. మన పాపని చాలా జాగ్రత్తగా చూసుకుంటావన్న నమ్మకం నాకు ఉంది.. ఏం టెన్షన్ పడకు.. అంతా నేను చూసుకుంటా”ఆగు ఆగు.. ఏం మాట్లాడుతున్నావ్ రా.. ఇప్పుడు ఇవన్నీ ఎందుకు చెప్తున్నావ్.. ఉండు వాటర్ తీసుకొస్తా..(ఇంతలో ఫోన్ రింగ్ అయింది) హలో.. మేము గవర్న్మెంట్ హాస్పిటల్ నుంచి మాట్లాడుతున్నాం.. అమర్ మీకేం అవుతారు..?నా భర్త అండి.. ఏంటి సంగతి.. ?ఆయనకి ఈరోజు ఉదయం యాక్సిడెంట్ అయింది.. ఆసుపత్రికి తీసుకొచ్చే లోపే చనిపోయారు.. వెరీ సారీవాట్.. !———–అవును..! నా అమర్ పోయి ఏడాది అయింది..! అందరూ తను చనిపోయిన తర్వాత నా లైఫ్ ఎలా ఉంటుందోనని టెన్షన్ పడ్డారు.. కానీ నేను మాత్రం అమర్ చనిపోయిన ఆరోజు గురించే ఇంకా ఆలోచిస్తూ ఉన్నా. ఆరోజు అమర్ రావడం.. నాతో మాట్లాడటం.. ఇప్పటికీ నాకు ఒక కల కాని కలలానే అనిపిస్తుంది. కల అని నన్ను నేనే నమ్మించుకుందామని ఎన్నో సార్లు ట్రై చేశా.. కానీ కల అయితే తను చెప్పిన వివరాలన్నీ అంత కరెక్ట్గా ఎలా ఉంటాయ్ అనే ప్రశ్న నన్ను వెంటాడుతూనే ఉంది. సరే ఆ వివరాలు ఎప్పుడైనా అమర్ నాకు చెప్పాడా అంటే లేదు.. పోనీ అది కూడా పక్కన పెడితే.. ఆరోజు అమర్ వచ్చాడన్నది నిజంగా నిజం.. దానికి ఆరోజు తను నా నుదుటిన పెట్టిన నెత్తుటి సింధూరమే సాక్ష్యం!! అది గుర్తొచ్చిన ప్రతిసారి కలకాలం నాతోనే ఉంటానని నువ్వు చెప్పిన మాటే కళ్ల ముందు నీ రూపంలా కనిపించిందేమో అనిపిస్తుంది. ఒక్కటి మాత్రం నిజం అమర్.. “నువ్వు నా ప్రాణం.. కాదు కాదు అంతకంటే ఎక్కువే”. నువ్వంటే ఎంత ప్రేమో చెప్పడానికి నీ మాటే వాడాను.. ఏమనుకోకురా బుజ్జిగా!!